( البلوقر )
كمصطلح عام ان اي شخص يكتب في الوب سايت (Blogging ) فهو بالتالي بلوغر وهالشي صحيح
☝️لكن الكلمة صارت دارجة ومتعارف عليها بالكويت انها تطلق الشخص الي عنده صفحة ويتكلم فيها عن اي منتج او مطعم
ويمدح بالبضاعة الفلانية أو المجمع الفلاني أو بالأصح أهوا الشخص الي ينعزم علي ايفنتات والمناسبات الاجتماعية عشان يرجع يكتب عنهم كلمتين
هذا التعريف الاجتماعي الحديث خلاني اكره هالكلمة
التصنيف او الاطار الي حطو فيه المدون وعمّموا الفكرة والسبب قله فهمهم لهذي التكنلوجية ، خلتني واايد اخاف اكتب حرف واحد في الوب سايت (Blogging )
اذا بنتكلم عن التدوين كفعل هذا شيء طبيعي وايد ناس يمارسونه بحياتهم اليومية حتي قبل التكنلوجيا
يعني مو البلوق الي بخليني احب اكتب او اتكلم
انا كشخص من سنة 95 كان عمري 12 سنة حزتها وانا اكتب يومياتي واسولف مع الورقة والقلم واكتب افكاري واناقشها
ونادر ما اخلي احد يقراها
مرات اخلي شخص واحد يقراها عشان اناقش الفكرة كموضوع حوار مو اكثر
لما ايي الشخص يفتح له بلوق اهوا يختار اي لاين واي ثيم راح تكون عليه صفحته
✨في ناس تحب العمل الصحفي فتأخذ البلوق كتغطية اخباريه
✨في ناس تحب تتكلم عن التكنلوجيا
✨في ناس تحب تكتب يومياتها فيه
✨في ناس ابدعت وقامت تكتب روايات واشعار ولهم قدرة تبارك الرحمن كتابية رهيبة طلعوها
✨في ناس تحب تحط نصايح مكياج او ازيااء
✨وفي ناس حبوا اهما بنفسهم يصورون نفسهم ويعرضون افكارهم بصفحتهم
كل واحد حر بالاطار الي حطه حق نفسه ، وكل هذول وانا معاهم دامنا نكتب فالمسمي يكون بلوقر
☝️بس وين الغلط الي صار وولأسف البلوقرز نفسهم اهما الي بدو بهالشي وهم شركات الي مايهما تعزم كل واحد بمجاله ليما خربوا تعريف البلوقرز بالكويت
وبالتالي بدو يخلطون اطارهم الي حطو حق نفسهم بالاطار الاعلاني الي صار مطلوب بشكل اكبر بالمجتع حاليا
صار البلوقر اهوا السوشل ميديا اهوا الصحفي اهوا الاعلامي اهوا المذيع اهوا عارض الازياء اهوا الايفنت بلانر اهوا الي لازم يكون المتواجد باي مكان بس بغرض الشهره
لان الشهرة عامل تسويقي ناجح بالتالي مدخول مادي للبعض منهم
☝️طبعا مو الكل لان وايد ناس اهما بالاساس احترفوه الشي وابدعوا فيه
بس اتكلم عن الشريحة الي ضاعت بالطوشة
الي قامت تطلق علي نفسها بلوقر واهيا ماتعرف ان وب سايت ولازم تكتب فيه شي
الي ماتعرف تصور شي مفيد وواضح
الشريحة التافهه الي مع الخيل يا شقرا
ليش اعتراضي على كلمة بلوقر
لاني مابي هالمصطلح الي ببال المجتمع
· تخيلو كل واحد عنده اكاونت بالانستقرام ويحط صور سموه مصور ؟ مايصير
· انزين سؤال : ليش مدونه النور مثلا او مدونه استكانه ولا الزين مانشوفهم بالايفنتات ؟؟
مع انهم من انجح البلوقات الكتابية الي كنت اتابعهم واحب اقرا كل حرف يكتبونه
لو اقول حق اي شخص استكانه مايعرفها لانها ماتنعزم علي ايفنتات ولا تكتب رايها عن بضاعه
خذت لها لاين وكملت عليه ولا خربت اطارها وانا اعتبرها من انجح البلوقر في وقتها واول انسانه تابعتها وحببتني بهالشي اتوقع بسنة 97
· طيب كل واحد يحضر ايفنت فهو بلوقر ؟ لاطبعا طول عمرنا لافتحنا المجله شفنا بصفحة المجتمع في حفل افتتاح محل فلاني
او جريدة او شركة مسويه عشا وفي ناس تصور وفي ووجوه كانت مألوفه مو لازم نعطيهم مسمي ولا سميناهم صحفيين يايين يغطون الحدث
كانوا ناس عاديين من ضمن المعازيم
· صح اكتب وراح اكتب سواء بورقة وقلم او بصفحة فاتحتها ببلاش بالسايت مو من جيب احد :p وصح اكتب 10 مواضيع وانشر واحد بس
وصح مايهمني أحد قرا لان بالنهاية هذا كلام من مخي ارتاح لما أطلعه وينتهي مع النقطه باخر السطر
لكن ماااا احب المعنى الي يقصدونه واهما يقولون (بلوقر) واهما معممين الشخصيه الاعلامية الي بمخهم علي هاللقب
· أخر نقطه للناس الي بقولون منو انتي الي تقولين جذي وطبعا هذولي دايما موجودين : انا مو قاعدة اهين احد بالعكس في منهم ربعي واحبهم بس هذا رايي انا هذا راي وحدة متابعه البلوقات بالكويت من اول ما طلعوا مو الحين
انا وحده قرقت بتوتتر وصار عندي معارف وقرقت بالانستقرام ليما صار عندي معارف اكثر فصرت احضر هالايفنتات كنوع من المعازيم مو للتغطية الاعلامية ، انا شخص عرفت وفرقت
بين المدون الناجح والمدون التافهه الي يدور الشهرة وبس . احيي كل مدون فاهم دربة واحب كل المدونات الي انا مسويتلهم فلو :P واقول الله يعينكم علي ما بلاكم بالاشيااء الي تشوفونها وتسمعونها
اللقب لكم انتوا تستاهلونه لاكن مايلوق لي.
انا بس اكتفي بفاطمة حمادة :*
وشكرا❤️
